काठमाडौं, २४ पुस– निर्वाचन तयारी सम्बन्धी विधेयक प्रस्तुत गर्न अनुमति पाएका कानुनमन्त्री अजयशंकर नायकलाई सभामुख ओनसरी घर्तीले संविधान संशोधन विधेयक टेबुल गर्न अनुमति दिएपछि आइतबार संसदमा संविधान संशोधन विधेयक टेबुल भएको छ । गृहमन्त्री बिमलेन्द्र निधिलाई अनुपस्थित गराई निधिले प्रस्तुत गर्ने भनिएको निर्वाचन विधेयक प्रस्तुत गर्ने रुलिङका आधारमा कानुनमन्त्रीले झुक्याएर संविधान संशोधन विधेयक प्रस्तुत गरेका हुन् ।
यसरी झुक्याएर र संविधान संशोधनको विपक्षमा रहेका प्रमुख प्रतिपक्षी एमाले सहितका नौ दलको असहमतिका बीच सभामुख घर्तीले संविधान संशोधन विधेयक अघि बढाएपछि उनीहरुले सभामुख घर्ती संसदीय अभ्यासको खिलाफमा गएको प्रतिक्रिया दिएका छन् ।

 

संविधान संशोधनको विपक्षमा एक तिहाइ भन्दा बढी सांसदहरु स्पष्ट रुपमा उभिए पनि सरकारले जबर्जस्ती रुपमा विधेयक अघि बढाएको हो । यसअघिको अभ्यास विपरित सभामुखले नै विधेयक अघि बढाउन अनुमति दिएपछि पनि प्रतिपक्षी सांसदहरुले आफ्नो विरोधले निरन्तरता पाउने वताएका छन् ।
‘सभामुखले यसअघि आफैले गरेको रुलिङ बिपरित संसदीय कारवाही अघि बढाउनुभयो, यो संसदीय अभ्यासको नितान्त खिलापमा छ’ एमाले सांसद तथा पूर्वमन्त्री अग्नि खरेलले  भने, ‘यसअघि यस्तो कहिल्यै पनि भएको थिएन । राष्ट्रघाती, संविधान बिरोधी बिधेयकबिरुद्ध एमाले लागयतका ९ दलको बिरोध जारी छ, यसले निरन्तरता पाउँछ ।’
सरकारले संविधान संशोधन विधेयक जबर्जस्ती प्रस्तुत गरेपछि संसद बैठकबाट बाहिरिएका एमाले उपाध्यक्ष बामदेव गौतमले यसलाई प्रस्ताव टेबुल भएको रुपमा मान्न नसक्ने र जबर्जस्ती गरेको रुपमा मान्न सक्ने वताए । ‘यसलाई पनि प्रस्ताव टेबुल गरेको भन्छन् ?’ गौतमले भने, ‘यो त जबर्जस्ती गरेको हो ।’
अब एमालेले के गर्छ ? 
संविधान संशोधन प्रस्तावलाई राष्ट्रघाती भन्दै आएको एमालेले आफ्नो विरोध जारी राख्दै यसलाई असफल बनाउने वताएको छ । संसदमा एमालेको विरोधको स्वरुप भने यसअघि माओवादीले गरेजस्तो हिंसात्मक नहुने वताएको छ । ‘हामी के गर्छाैं भनेर सोध्नै परेन, हामी विरोध गर्छाैं उहाँहरुको जस्तो संसदमा हिंसात्मक रुपमा जाँदैनौं’ गौतमले भने, ‘विधेयकलाई सालीन विरोध गर्छाैं र असफल पार्छाैं ।’
झुक्याएर संशोधन विधेयक
संसदमा संविधान संशोधन प्रस्ताव टेबुल गर्न नदिने अडानमा रहेको एमालेलाई आइतबारको संसद बैठकमा झुक्याउने काम भने गृहमन्त्री बिमलेन्द्र निधिले गरेका थिए । निधिले निर्वाचन तयारी सम्बन्धि विधेयकहरु संसदमा प्रस्तुत गर्ने समय दिंदा सभामुख घर्तीले निधि अनुपस्थित रहेको भन्दै कानुनमन्त्री अजयशंकरलाई विधेयक प्रस्तुत गर्ने अनुमति दिइन् । निर्वाचन सम्बन्धी विधेयकमा अवरोध नगर्ने विपक्षी दलको घोषणा नै थियो । तर, निर्वाचन सम्बन्धी विधेयक प्रस्तुत गर्न गएका कानुनमन्त्रीले संविधान संशोधन विधेयक टेबुल गर्न थालेपछि विपक्षी सांसदहरुले उठेर विरोध जनाएका थिए । यसरी निर्वाचन सम्बन्धी विधेयक प्रस्तुत गर्न लागेको भन्दै विपक्षीलाई झुक्याएर सभामुखले संविधान संशोधन विधेयक प्रस्तुत गर्न लगाएकी थिइन् ।

LEAVE A REPLY