विश्वकप छनौट : पाउलिन्होको ह्याट्रिकमा ब्राजिलको सहज जित

0
450

काठमाडौं ।  आगामी बर्ष रुसमा हुने विश्वकप फुटबलको छनौटमा ब्राजिलले सहज जित निकालेको छ । विश्वकप छनौट अन्तर्गत शुक्रबार बिहान भएको दक्षिण अमेरिकी महादेशको छनोटमा ब्राजिलले उरुग्वेलाई ४–१ ले पराजित गरेको हो ।

उरुग्वेको घरेलु मैदानमा भएको खेलमा ब्राजिललाई जित दिलाउन मिडफिल्डर पाउलिन्होले ह्याट्रिक गरे । त्यस्तै ब्राजिलको जितमा नेयमारले एक गोल थपे । उरुग्वेका इडिसन काभानीले एक गोल फर्काए । जितसँगै ब्राजिलले विश्वकपमा छनोट हुने सम्भावना बलियो बनाएको छ ।

घरेलु मैदानमा भएको खेलमा सुरुवाती अग्रता भने उरुग्वेले लिएको थियो । खेलको नवौं मिनेटमा काभानीले गोल गर्दै घरेलु टोलीलाई अग्रता दिलाएका थिए । तर खेलको १९ औ मिनेटमा पाउलिन्होले एक गोल फर्काएपछि पहिलो हाफ १–१ गोलको बराबरीमा सकियो ।

दोस्रो हाफमा भने ब्राजिल हाबी भयो ।  खेलको ५२ औं मिनेटमा पाउलिन्होले व्यक्तिगत दोस्रो गोल गर्दै ब्राजिलको अग्रता २ – १ बनाए । खेलको ७४ औ मिनेटमा नेयमारले गोल गर्दै ब्राजिलको अग्रता ३ – १ बनाए । त्यसपछि खेलको इन्जुरी समयमा  पाउलिन्होले गोल गर्दै ब्राजिललाई ४ – १ को जित दिलाए ।
जितसंगै दक्षिण अमेरिकी महादेशको छनोटको शिर्ष स्थानमा रहेको ब्राजिलले १३ खेलबाट ३० अंक जोडेको छ । ब्राजिलसँग पराजित उरुग्वेको समान खेलबाट २३ अंक छ । र, उरुग्वे दोस्रो स्थानमा छ । रुसमा हुने विश्वकपमा दक्षिण अमेरिकी महादेशबाट शिर्ष ४ देश सिधै विश्वकपका लागि छनौट हुनेछन् भने पाँचौ स्थानकोले प्लेअफ खेल्न पाउने छ ।
विश्वकप छनोट अन्तर्गत नै दक्षिण अमेरिकी महादेशको अन्य छनोट खेलमा कोलम्बियाले बोलाभियालाई १–० ले, पराग्वेले इक्वेडरलाई २–१ ले पराजित गर्दा भेनेजुएला र पेरुले २–२ गोलको बराबरी खेल्दै अंक बाडेका छन् ।

LEAVE A REPLY